काठमाडौं । प्रतिनिधिसभा निर्वाचनको मतगणना जारी रहे पनि कठिन राजनीतिक संक्रमणका बीच सम्पन्न भएको मतदानलाई लोकतान्त्रिक प्रक्रियाको महत्वपूर्ण उपलब्धि मानिएको छ। अस्थिरता र अनिश्चितताबीच निर्वाचन सफलतापूर्वक सम्पन्न गराउन अन्तरिम सरकारको नेतृत्व गरिरहेकी सुशीला कार्की को भूमिकाको चर्चा सुरु भएको छ।
जेनजी आन्दोलनपछि उत्पन्न राजनीतिक अस्थिरताबीच देशमा चुनाव सम्भव हुन्छ कि हुँदैन भन्ने प्रश्न उठिरहेको अवस्थामा कार्की नेतृत्वको सरकारले निर्वाचन प्रक्रिया अघि बढाएको थियो। त्यसअघि संसद्बाट निर्वाचित प्रधानमन्त्री केपी शर्मा ओली आन्दोलनपछि पदबाट हटेपछि मुलुकमा राजनीतिक अन्योल बढेको थियो।
अन्तरिम सरकार गठनपछि सुरक्षा व्यवस्था मिलाउने, राजनीतिक दल तथा आन्दोलनकारी समूहसँग संवाद गर्ने र चुनावी वातावरण बनाउने चुनौती सरकारसमक्ष थियो। विभिन्न पक्षसँग निरन्तर संवाद र सहमतिको प्रयासपछि अन्ततः देशभर मतदान शान्तिपूर्ण रूपमा सम्पन्न भएको बताइएको छ।
राजनीतिक विश्लेषकहरूका अनुसार यो निर्वाचनले नयाँ प्रतिनिधि चयन गर्ने मात्र नभई आन्दोलनपछि देखिएको राजनीतिक संक्रमणलाई संस्थागत लोकतान्त्रिक प्रक्रियामा फर्काउने महत्वपूर्ण कदमसमेत बनेको छ। अब मतगणनापछि आउने परिणामसँगै नयाँ निर्वाचित सरकारले जिम्मेवारी सम्हाल्ने अपेक्षा गरिएको छ।
