वेलिङ्टन । इमिग्रेसन न्युजिल्यान्ड (INZ) को विवादित बायोमेट्रिक क्यापाबिलिटी अपडेट आईटी परियोजनाका कारण सरकारले कति रकम तिर्नुपर्ने हुन सक्छ भन्ने विषयमा सरकारले स्पष्ट जानकारी दिन अस्वीकार गरेको छ।
सरकारी अधिकारीहरूले मुख्य प्रविधि कम्पनी NEC ले कम्तीमा ४ मिलियन न्युजिल्यान्ड डलरको डुबेको लागत दाबी गर्न सक्ने बताएका छन्। गुणस्तर सुनिश्चितता प्रतिवेदनले परियोजना २०२५ को समयसीमाभन्दा ढिला हुँदा INZ लाई महिनामा ७ लाख ५० हजार डलरसम्म शुल्क लाग्न सक्ने चेतावनीसमेत दिएको थियो।
सरकारमाथि करिब १२ मिलियन डलरको सम्भावित दायित्व रहेको भए पनि स्वतन्त्र छानबिन पूरा नभएसम्म यसबारे टिप्पणी नगर्ने सरकारले जनाएको छ।
यसैबीच, अध्यागमन मन्त्री एरिका स्ट्यानफोर्डले INZ को नयाँ ३३६ मिलियन डलरको आठवर्षे ‘आवर फ्युचर सर्भिसेस’ (OFS) परियोजनाबाट हुने अपेक्षित बचत सुरुवाती अनुमानभन्दा कम हुने स्वीकार गरेकी छन्।
INZ ले चालु आर्थिक वर्षमा आफ्नो भिसा खातामा ९० मिलियन डलर घाटा हुने प्रक्षेपण गरेको छ। यससँगै सरकारले पुनः भिसा शुल्क तथा लेभीको समीक्षा गर्ने तयारी गरेको छ।
