न्युजिल्यान्डका लेबर पार्टी नेता क्रिस हिप्किन्स ले प्रधानमन्त्री क्रिस्टोफर लक्जन र उपप्रधानमन्त्री तथा विदेशमन्त्री विन्स्टन पिटर्स गठबन्धन सरकारमै रहँदा एक–अर्कामाथि झूट बोलिरहेको आरोप लगाइरहेको बताएका छन्। उनले यसलाई नेसनल र न्युजिल्यान्ड फर्स्टका नेताबीच स्वस्थ कार्यसम्बन्ध नहुनुको संकेत का रूपमा व्याख्या गरेका छन्।
रेडियो न्युजिल्यान्डको मर्निङ रिपोर्ट कार्यक्रममा बोल्दै हिप्किन्सले प्रधानमन्त्री लक्जनले आफ्नै उपप्रधानमन्त्री पिटर्सलाई गलत र सत्य नबताएको भन्ने अर्थ लाग्ने अभिव्यक्ति दिएको बताए। “प्रधानमन्त्रीले पिटर्स गलत छन्, उनका तथ्यांक गलत छन् र उनी न्युजिल्यान्डवासीप्रति स्पष्ट छैनन् भनेर भनिरहेका छन्,” हिप्किन्सले भने।
कार्यक्रमकी प्रस्तोता इन्ग्रिड हिप्किस ले कसैलाई गलत भन्नु र झूटो भन्नु फरक कुरा भएको उल्लेख गरेपछि हिप्किन्सले प्रतिक्रिया दिँदै भने, “उनीहरू दुवैले व्यवहारिक रूपमा एक–अर्काबारे त्यही कुरा भनिरहेका छन्।”
हिप्किन्सका अनुसार आप्रवासनसम्बन्धी विषयमा जनतालाई सत्य नबताइएको भन्ने पिटर्सको दाबी गम्भीर आरोप हो। “जब विदेशमन्त्रीले प्रधानमन्त्रीले सत्य नबताएको भन्छन्, त्यो वर्तमान सरकारमाथिको गम्भीर अभियोग हो,” उनले भने।
प्रधानमन्त्री लक्जन र पिटर्सबीच भारतसँगको स्वतन्त्र व्यापार सम्झौतामा रहेका आप्रवासनसम्बन्धी प्रावधानलाई लिएर मतभेद सार्वजनिक भएपछि हिप्किन्सको टिप्पणी आएको हो। लक्जनले यस विवादलाई “परिपक्व असहमति” भनेका छन्।
न्युजिल्यान्ड फर्स्टका नेता पिटर्सले उक्त सम्झौताका कारण “दशौँ हजार मानिस न्युजिल्यान्ड आउन सक्ने र त्यसले न्युजिल्यान्डरहरूको अवसर खोस्न सक्ने” दाबी गर्दै आएका छन्। उनले यस विषयमा जनतालाई सत्य नबताइएको आरोप पनि लगाएका छन्। तर नेसनल पार्टीले उक्त आरोपलाई अस्वीकार गर्दै पिटर्स यस विषयमा गलत रहेको जनाएको छ।
यसैबीच, लेबर पार्टी र ग्रीन पार्टीले वाइतान्गीमा संयुक्त रूपमा उपस्थित भई आपसी सहकार्य र एकताको सन्देश दिने तयारी गरेका छन्। “असहमति राख्न सकिन्छ, तर अपमानमा नउत्री रचनात्मक रूपमा सँगै काम गर्न सकिन्छ,” हिप्किन्सले भने। “हालको सरकारमा भने वरिष्ठ मन्त्रीहरू नै एक–अर्कामाथि कटाक्ष गरिरहेका छन्, जुन एमएमपी प्रणालीको भावना होइन।”
समाचार स्रोत: रेडियो न्युजिल्यान्ड (RNZ) – Morning Report
