जलवायु परिवर्तनको प्रभाव तीव्र बन्दै जाँदा स्ट्रोक (मस्तिष्काघात) को जोखिम समेत बढ्दै जाने चेतावनी चिकित्सकहरूले दिएका छन् । हालै सार्वजनिक एक अनुसन्धानअनुसार अत्यधिक गर्मी, आर्द्रता, डढेलो र धुलो आँधी जस्ता वातावरणीय कारणहरूले मानिसको मस्तिष्क स्वास्थ्यमा गम्भीर असर पार्न सक्छन् ।
अनुसन्धानमा संलग्न विशेषज्ञहरूका अनुसार अत्यधिक गर्मी र आर्द्रताका कारण शरीरमा पानीको कमी भई रगत बाक्लिने हुँदा स्ट्रोकको जोखिम बढ्ने गर्दछ । विशेषगरी वृद्धवृद्धा, पहिलेदेखि मुटु तथा रक्तनलीसम्बन्धी रोग भएका व्यक्ति, बाहिर काम गर्ने श्रमिक तथा स्वास्थ्य सेवामा कम पहुँच भएका समुदाय बढी जोखिममा पर्ने बताइएको छ ।
विश्वव्यापी रूपमा करिब २० प्रतिशत स्ट्रोक वायु प्रदूषणसँग सम्बन्धित रहेको तथ्यसमेत अध्ययनले देखाएको छ । साथै, चरम मौसमका कारण स्वास्थ्य सेवा अवरुद्ध हुँदा पनि मृत्यु दर बढ्न सक्ने चिन्ता व्यक्त गरिएको छ ।
विशेषज्ञहरूले जलवायु परिवर्तनको असर कम गर्न सरकारी नीतिगत पहल आवश्यक रहेको र स्वास्थ्य क्षेत्रमा तयारी बढाउनुपर्ने बताएका छन् । घरहरू सुरक्षित र व्यवस्थित बनाउने, चरम मौसमका बेला आश्रयको व्यवस्था गर्ने तथा समयमै चेतावनी प्रणाली विकास गर्नुपर्नेमा जोड दिइएको छ ।
यसैबीच, पर्याप्त पानी पिउने, गर्मीबाट जोगिने र स्वास्थ्यप्रति सचेत रहने उपायहरूले केही हदसम्म जोखिम कम गर्न सकिने बताइएको छ । तर हालकै गतिमा जलवायु परिवर्तन बढिरहेमा भविष्यमा स्ट्रोकसहित अन्य स्वास्थ्य समस्याहरू थप बढ्ने चेतावनी दिइएको छ ।
