आगामी दुई वर्षमा १० लाखभन्दा बढी राहदानी नवीकरण गर्नुपर्ने

आगामी दुई वर्षभित्र १० लाखभन्दा बढी राहदानी नवीकरण हुन बाँकी रहेकाले न्यू जिल्यान्डकी आन्तरिक मामिला मन्त्री ब्रुक भान भेल्डेनले यस विषयमा सबैलाई सचेत रहन आग्रह गरेकी छन् ।

आन्तरिक मामिला विभागका अनुसार १० वर्षे राहदानीको पहिलो चरण म्याद सकिन लागेकाले आवेदनको संख्या एकाएक बढ्ने अपेक्षा गरिएको छ । सन् २०१५ को अन्त्यतिर राहदानीको वैधता अवधि पाँच वर्षबाट १० वर्ष बनाइएको थियो । त्यसैले २०१५ र २०१६ मा नवीकरण गरिएका राहदानीहरूको म्याद आगामी दुई वर्षभित्र सकिँदैछ ।

“१० वर्षे राहदानी सुरु भएको वार्षिकोत्सवका कारण आवेदनको चाप बढ्ने पूर्वानुमान गरिएको छ । तपाईंलाई आवश्यक पर्नुअघि नै आफ्नो राहदानी अद्यावधिक छ कि छैन, अवश्य जाँच गर्न आग्रह गर्छु,” भान भेल्डेनले भनिन् भनी रेडियो न्यूजिल्यान्डले समाचार छापेको छ ।

आगामी दुई वर्षभित्र करिब १३ लाख राहदानीको म्याद सकिन लागेको छ । सन् २०२६ मा करिब ६ लाख २२ हजार र सन् २०२७ मा करिब ७ लाख ५९ हजार आवेदन पर्ने अनुमान गरिएको छ ।

भान भेल्डेनले राहदानी प्रक्रिया समय निकै सुधारिएको बताइन् । सन् २०२३ मा २५ दिन लाग्ने प्रक्रिया अहिले तीन दिनमै सकिने गरेको उनले भनिन् । तर आवेदनको ठूलो संख्याका कारण ढिलाइ हुन सक्ने चेतावनी पनि दिइन् ।

“न्यू जिल्यान्डवासीहरूले उत्कृष्ट सेवा पाउने अपेक्षा गर्नु स्वाभाविक हो, र हाम्रो राहदानी टोलीले त्यो उपलब्ध गराएकोमा म गर्व गर्छु । यदि तपाईंको राहदानी २०२६ मा म्याद सकिँदैछ भने भीड बढ्नुअघि नै नवीकरण गर्नुहोस् । म्याद सकिएको राहदानीले तपाईंको यात्रा अवरुद्ध नहोस्,” उनले भनिन् ।