उत्तर कोरियाको आणविक कार्यक्रम नियन्त्रणमा चीनको सहयोगको आग्रह

बेइजिङ — दक्षिण कोरियाली राष्ट्रपति ली जे–म्युङले चिनियाँ राष्ट्रपति सी जिनपिङसँग भेट गर्दै उत्तर कोरियाको आणविक हतियार कार्यक्रम नियन्त्रणमा लिन चीनले सक्रिय मध्यस्थ भूमिका निर्वाह गर्नुपर्ने आग्रह गर्नुभएको छ। उहाँले अनुकूल परिस्थितिमा प्योङयाङको आणविक कार्यक्रम ‘स्थगन’ गर्न सकिने सम्भावनाबारे पनि धारणा राख्नुभएको हो।

छ वर्षपछि दक्षिण कोरियाली राष्ट्रपतिद्वारा चीनको गरिएको यो पहिलो औपचारिक भ्रमणलाई सियोलले चीनसँगको सम्बन्ध पुनः सुदृढ बनाउने तथा उत्तर कोरियासँग जटिल बन्दै गएको परिस्थितिमा कूटनीतिक सहयोग खोज्ने प्रयासका रूपमा लिएको छ। भेटका क्रममा राष्ट्रपति लीले कोरियाली प्रायद्वीपमा शान्ति स्थापना र संवाद पुनः सुरु गर्न चीनको भूमिका निर्णायक हुनसक्ने उल्लेख गर्नुभयो।