इराकको पश्चिमी आकाशमा अमेरिकी सेनाको एक इन्धनवाहक विमान दुर्घटनाग्रस्त भएको छ। इरानविरुद्ध अमेरिका र इजरायलको संयुक्त सैन्य अभियानको भागको रूपमा उडान भरेको केसी-१३५ विमान बिहीबार पश्चिमी इराकको मरुभूमि क्षेत्रमा खसेको हो।
अमेरिकी सेन्ट्रल कमाण्डका अनुसार यो दुर्घटना कुनै बाह्य आक्रमण वा आफ्नै सेनाबाट लागेको प्रहारका कारण नभएको स्पष्ट पारिएको छ। अमेरिकी रक्षा मन्त्रालयले भनेका अनुसार दुर्घटना मित्रवत वायुक्षेत्रमा भएकाले तत्काल उद्धार कार्य सुरु गरिएको थियो।
इरानविरुद्धको अमेरिकी सैन्य अभियान ‘अपरेशन एपिक फ्युरी’ अन्तर्गत उडान भरेका दुई विमानमध्ये एउटै विमान दुर्घटनामा परेको हो। दोस्रो विमान भने सुरक्षित रूपमा अवतरण भएको पेन्टागनले जनाएको छ।
सीएनएनले जनाएको छ कि दुर्घटनाग्रस्त विमानमा कम्तीमा पाँच जना चालक दलका सदस्यहरू सवार थिए। उनीहरूको स्वास्थ्य र अवस्था बारे हालसम्म कुनै आधिकारिक जानकारी सार्वजनिक गरिएको छैन। पेन्टागनले पीडित परिवारहरूलाई जानकारी दिन केही समय लाग्ने भन्दै धैर्य राख्न आग्रह गरेको छ।
केसी-१३५ विमान सामान्यतया आकाशमा रहेका अन्य लडाकु विमानहरूमा इन्धन आपूर्ति गर्न प्रयोग गरिन्छ। यस प्रकारका विमानमा प्रायः पाइलट, सह-पाइलट र इन्धन भर्ने प्राविधिक (बुम अपरेटर) सहित तीनदेखि चारजनाको टोली रहने भए पनि यस मिशनमा पाँच जना सवार रहेको बताइएको छ।
यसअघि मात्र गत हप्ता कुवेतको आकाशमा ‘मित्रवत प्रहार’ का कारण तीनवटा अमेरिकी एफ-१५ लडाकु विमानहरू दुर्घटनाग्रस्त भएका थिए। तर उक्त घटनामा सबै छ जना चालक दलका सदस्यहरू सुरक्षित रूपमा बाहिर निस्कन सफल भएका थिए। अहिलेको दुर्घटनाबारे थप अनुसन्धान जारी रहेको सेन्ट्रल कमाण्डले जनाएको छ।
