बंगलादेशमा हिजो सम्पन्न ऐतिहासिक संसदीय निर्वाचनमा बंगलादेश नेसनलिस्ट पार्टी (बीएनपी) ले दुई तिहाइभन्दा बढी सिटमा विजय हासिल गरेको छ। अधिकांश निर्वाचन क्षेत्रको मतगणना सकिएको अवस्थामा ३०० सदस्यीय संसदमा बीएनपीले २०० भन्दा बढी सिट जितेको पुष्टि भएको छ। यससँगै पार्टीका प्रमुख तारिक रहमान नयाँ प्रधानमन्त्री बन्ने लगभग निश्चित भएको छ।
लामो राजनीतिक उतारचढाव, १७ वर्षको निर्वासन र दर्जनौँ कानुनी मुद्दाको सामना गरेका ६० वर्षीय रहमानको यो जितलाई बंगलादेशको राजनीतिमा महत्वपूर्ण मोडका रूपमा हेरिएको छ। सन् २०२४ को ‘जुलाई आन्दोलन’ पश्चात् निर्माण भएको नयाँ राजनीतिक परिवेशमा बीएनपीले व्यापक जनसमर्थन जुटाउँदै स्पष्ट बहुमत प्राप्त गरेको हो।
तारिक रहमान प्रभावशाली जिया परिवारका सदस्य हुन्। उनका पिता जियाउर रहमान बंगलादेशको स्वतन्त्रता संग्रामसँग जोडिएका सैन्य नेतृत्वकर्ता तथा पूर्व राष्ट्रपति थिए भने आमा बेगम खालिदा जिया पूर्व प्रधानमन्त्री हुन्। रहमानले सन् १९८८ देखि सक्रिय राजनीति सुरु गर्दै पार्टी संगठन सुदृढीकरणमा महत्वपूर्ण भूमिका निर्वाह गरेका थिए।
सन् २००१–२००६ को बीएनपी नेतृत्वको शासनकालपछि देशमा उत्पन्न राजनीतिक संकट र २००७ को सैन्य-समर्थित अन्तरिम व्यवस्थापछि रहमानमाथि भ्रष्टाचारका आरोप लगाइएका थिए। २००८ मा उपचारका लागि लन्डन गएका उनी त्यसपछि लामो समय निर्वासनमै रहे। यस अवधिमा उनीमाथि विभिन्न मुद्दा दायर गरिए र अदालतले अनुपस्थितिमै सजाय सुनाएको थियो।
सन् २०२४ मा विद्यार्थी आन्दोलन चर्किएर तत्कालीन प्रधानमन्त्री शेख हसिनाको बहिर्गमनपछि बंगलादेशको राजनीतिक समीकरणमा व्यापक परिवर्तन आएको थियो। अन्तरिम सरकारले निर्वाचन प्रक्रिया पुनर्संरचना गर्दै नयाँ निर्वाचन गराएको हो। सोही पृष्ठभूमिमा सम्पन्न निर्वाचनमा बीएनपीले स्पष्ट बहुमत प्राप्त गरेको छ।
विश्लेषकहरूका अनुसार बीएनपीको विजय केवल संगठनात्मक शक्ति मात्र नभई राजनीतिक परिस्थितिको परिणाम पनि हो। अवामी लिगको सहभागिता नभएको चुनावी प्रतिस्पर्धाले बीएनपीलाई सहज अवस्था सिर्जना गरेको आकलन गरिएको छ। रहमानले निर्वासनमै रहेर पार्टी संगठनलाई सक्रिय राखेको र युवा मतदातासँग संवाद विस्तार गरेको पक्षलाई पनि जितको कारण मानिएको छ।
यद्यपि, आगामी सरकारका लागि चुनौतीहरू कम छैनन्। बंगलादेशको अर्थतन्त्र उच्च मुद्रास्फीति, विदेशी मुद्रा सञ्चितिमा गिरावट र उद्योग क्षेत्रको सुस्ततासँग जुधिरहेको छ। नयाँ नेतृत्वले आयात व्यवस्थापन, निर्यात प्रवर्द्धन र वैदेशिक लगानी आकर्षित गर्ने नीतिमा जोड दिनुपर्ने देखिन्छ।
त्यस्तै, राज्यका प्रमुख संस्थाहरूमा जनविश्वास पुनर्स्थापना, राजनीतिक स्थायित्व कायम राख्ने र कानून व्यवस्था सुदृढ बनाउने जिम्मेवारी पनि नयाँ सरकारको काँधमा रहनेछ। परराष्ट्र नीतिमा भारत, चीन र अमेरिका लगायत प्रमुख साझेदार राष्ट्रहरूसँग सन्तुलित सम्बन्ध कायम राख्नु अर्को महत्वपूर्ण पक्ष हुनेछ।
बीएनपीको स्पष्ट बहुमतसँगै बंगलादेश नयाँ राजनीतिक अध्यायतर्फ अघि बढेको छ। अब गठन हुने सरकारको कार्यसम्पादनले देशको भावी दिशा निर्धारण गर्ने अपेक्षा गरिएको छ।
