नयाँ प्रतिनिधिसभाको कार्यकाल सुरु, नवनिर्वाचित सांसदद्वारा शपथ ग्रहण

काठमाडौं — नवनिर्वाचित प्रतिनिधिसभा सदस्यहरूले पद तथा गोपनीयताको शपथ ग्रहण गर्दै नयाँ कार्यकाल औपचारिक रूपमा सुरु गरेका छन्। सिंहदरबारस्थित नवनिर्मित संसद भवनको बहुउद्देश्यीय सभाहलमा बिहीबार आयोजित समारोहमा जेष्ठ सदस्य अर्जुन नरसिंह केसीले सांसदहरूलाई शपथ गराएका हुन्।

२१ फागुनमा सम्पन्न प्रतिनिधिसभा निर्वाचनबाट निर्वाचित २७५ जना सांसदहरूले शपथ लिएका थिए। शपथ ग्रहणका क्रममा सांसदहरू आ–आफ्नो सांस्कृतिक पहिचान झल्किने पोशाकमा उपस्थित भएका थिए। तीमध्ये ६१ जनाले नेपाल भाषा, मैथिली, भोजपुरी, थारू, तामाङ, संस्कृतलगायत विभिन्न मातृभाषामा शपथ लिएका छन्। मातृभाषामा शपथ लिने सांसदहरूले नेपाली र आफ्नो मातृभाषा दुवैमा हस्ताक्षर गरेका छन्।

सभामुखको निर्वाचन नभएसम्म संसदको जेष्ठ सदस्यले नै शपथ गराउने कानुनी व्यवस्था अनुसार केसीले शपथ गराएका हुन्। उनले यसअघि राष्ट्रपति Ram Chandra Paudel रामचन्द्र पौडेलसमक्ष शपथ लिएका थिए।

कार्यक्रमअघि संघीय संसदका महासचिव पदमप्रसाद गौतमले नवनिर्वाचित सांसदहरूलाई स्वागत गरेका थिए।

यस निर्वाचनमा राष्ट्रिय स्वतन्त्र पार्टीले १८२ सिटसहित स्पष्ट बहुमत हासिल गरेको छ, जुन २०५६ सालपछि पहिलोपटक कुनै दलले एकल बहुमत प्राप्त गरेको हो। अघिल्लो संसदमा पहिलो दल रहेको नेपाली कांग्रेस यसपटक ३८ सिटमा सीमित भएको छ भने नेकपा एमालेले २५, नेकपाले १७, श्रम संस्कृति पार्टीले ७ र राष्ट्रिय प्रजातन्त्र पार्टीले ५ सिट प्राप्त गरेका छन्।

सांसदहरूको शपथसँगै अब राष्ट्रपतिले संसदको अधिवेशन आह्वान गर्नेछन्। पहिलो बैठकमा दुवै सदनलाई राष्ट्रपतिले सम्बोधन गर्ने कार्यक्रम रहेको छ।