न्युजिल्यान्डको तल्लो उत्तरी टापुमा भीषण वर्षापछि पहिरो जाँदा केही घरहरू बस्नका लागि अयोग्य देखिएको समाचार सार्वजनिक भएको छ। वर्षा र तीव्र हावाहुरीपछि विभिन्न क्षेत्रमा क्षति पुगेको छ भने बाटोमा रुखहरू ढलेका छन्, घरहरूमा बाढी पसेको छ र केही विद्यालयहरू बन्द गर्नुपरेको छ। यही क्रममा वेलिङ्टन सहरको उत्तरतर्फ पर्ने स्टोक्स भ्यालीमा एक परिवारको घर पहिरोका कारण बस्न अयोग्य बनेको छ।
स्टोक्स भ्यालीका चित्रकार एरन पालले सोमबार बिहान विद्यालय बन्द भएपछि आफ्ना दुई सन्तानलाई लिएर घर फर्कँदा अनौठो दृश्य देखेको बताए। उनले भने, “आँगनतिर हेर्दा केही ठीक नभएको जस्तो लाग्यो। जमिन करिब डेढ मिटर तल झरेको थियो।”
करिब आधा घण्टापछि बाहिर निस्कँदा उनले रुखहरू चर्किने र जमिन चिराचिरा हुने आवाज सुने। “मैले तुरुन्तै छोराछोरीलाई माथि सुरक्षित ठाउँमा जान कराएँ। हेर्दाहेर्दै पूरै जमिन तलतिर सर्दै गयो,” उनले भने।
पहिरोसँगै पछाडिको बार, हरितगृह र स्काफोल्डिङको एक भाग तल खोँचमा खसेको उनले बताए। करिब ३० गुणा १० वर्गमिटर क्षेत्रफल बराबरको जमिन एकैचोटि बगेर गएको अनुमान गरिएको छ। पहिरो खसेपछि घरको डेक र पछाडिको जग हावामा झुन्डिएको अवस्थामा पुगेको छ।
पालका अनुसार पहिरो खसेको ढिस्कोमा करिब ३० मिटर अग्ला पुराना मानुका रुखहरू थिए। “ती रुखहरू वर्षौंदेखि त्यहीँ थिए, जराहरू निकै गहिरा थिए होला भन्ने लाग्थ्यो। तर ती पनि जमिन थाम्न पर्याप्त भएनन्,” उनले भने।
परिवारले हतारमा केही व्यक्तिगत सामान मात्र लिएर घर छोड्नुपरेको थियो। त्यसपछि नगर परिषद्का कर्मचारीहरूले घरमा ‘खतरनाक भवन’ सम्बन्धी सूचना टाँसेका छन्। उक्त सूचनामा घर सुरक्षित नभएको र आवश्यक मर्मत–सम्भार नगरेमा भत्काउनुपर्ने उल्लेख गरिएको छ।
हाल पालको परिवार आफन्तको घरमा अस्थायी रूपमा बसिरहेको छ। बीमा कम्पनीसँग आवास सहयोगसम्बन्धी छलफल भइरहेको उनले जानकारी दिए। “मैले केही समयअघि मात्रै नयाँ भान्सा, नयाँ बाथरूम, कार्पेट र भित्री सजावटमा हजारौं डलर खर्च गरेको थिएँ। परिवारका लागि राम्रो भविष्य बनाउने सोच थियो। अहिले सबै अनिश्चित बनेको छ,” उनले गुनासो गरे।
लोअर हट सिटी काउन्सिलका प्रवक्ताले घरलाई आधिकारिक रूपमा ‘खतरनाक भवन’ घोषणा गरिएको पुष्टि गरेका छन्। भवनमा बसोबास गर्न असुरक्षित ठहर गरिएको र आगामी प्रक्रियासम्बन्धी निर्देशन घरधनीलाई प्रदान गरिएको जनाइएको छ।
भारी वर्षा र तीव्र हावाहुरीका कारण क्षेत्रका अन्य बासिन्दाहरू पनि क्षतिबारे चिन्तित छन्। स्थानीय प्रशासनले बासिन्दालाई सतर्क रहन, जोखिमयुक्त स्थानबाट टाढा बस्न र आवश्यक परे आपतकालीन सेवासँग सम्पर्क गर्न आग्रह गरेको छ। समाचार आरएनजेड नेसनल रेडियोबाट।
