सार्वजनिक गरिएको आधिकारिक तथ्याङ्कअनुसार डिसेम्बर महिनामा अस्ट्रेलियाको बेरोजगारी दर घटेर ४.१ प्रतिशतमा झरेको छ। अस्ट्रेलियन ब्युरो अफ स्ट्याटिस्टिक्सका अनुसार नोभेम्बरमा ४.३ प्रतिशत रहेको बेरोजगारी दर डिसेम्बरमा घट्दै ४.१ प्रतिशत कायम भएको हो, जुन सन् २०२५ मा हालसम्मकै न्यून स्तर हो।
यसै अवधिमा रोजगारीमा रहेका अस्ट्रेलियालीहरूको संख्या उल्लेख्य रूपमा बढेको छ। नोभेम्बर र डिसेम्बरको बीचमा रोजगारीमा रहेका व्यक्तिहरूको कुल संख्या ६५ हजार २ सयले वृद्धि भएको छ भने आधिकारिक रूपमा बेरोजगारको सूचीमा रहेका व्यक्तिहरूको संख्या २९ हजार ८ सयले घटेको छ।
त्यसैगरी, अस्ट्रेलियालीहरूले काम गरेको कुल समय पनि नयाँ कीर्तिमानमा पुगेको छ। नोभेम्बरको तुलनामा डिसेम्बरमा कुल काम गर्ने घण्टा ०.४ प्रतिशतले वृद्धि भई पहिलो पटक २ अर्ब घण्टा पुगेको छ, जुन अहिलेसम्मकै उच्च स्तर हो।
