राष्ट्रिय स्वतन्त्र पार्टीका सभापति रवि लामिछानेको राजनीतिक शैलीमा उल्लेखनीय रूपान्तरण देखिएको छ। आम चुनावअघि आक्रामक अभिव्यक्ति र तीखा भाषणमार्फत चर्चामा आएका उनी अहिले संयम, जिम्मेवारी र परिपक्व नेतृत्वको सन्देश दिन थालेका छन्।
ललितपुरको ग्वार्कोस्थित एक होटलमा आयोजित नव–निर्वाचित सांसदहरूको अभिमुखीकरण कार्यक्रममा सम्बोधन गर्दै लामिछानेले विगतको शैलीबाट अलग देखिने प्रयास गरेका हुन्। शक्तिसँगै आउने अहंकारबाट जोगिनुपर्नेमा जोड दिँदै उनले जनताको विश्वास कायम राख्न नसके छोटो समयमै अस्वीकृत हुनुपर्ने चेतावनी दिएका छन्।
उनले जनताको चेतनास्तर बढिसकेको उल्लेख गर्दै अब नागरिकले विगतजस्तो लामो समय कुर्ने अवस्था नरहेको स्पष्ट पारे। “जनताले अब परिणाम खोज्छन्, वाचा होइन,” भन्ने सन्देशमार्फत उनले आफ्नो पार्टीका सांसदहरूलाई थप जिम्मेवार बन्न निर्देशन दिएका छन्।
लामिछानेले अघिल्लो निर्वाचनमा नागरिकले नयाँ शक्तिलाई परीक्षणका रूपमा सीमित अवसर दिएको उल्लेख गर्दै अहिले प्राप्त समर्थनलाई ठूलो जिम्मेवारीका रूपमा लिनुपर्ने बताएका छन्। उनले अब परिणाममार्फत जनताको विश्वासको उत्तर दिनुपर्ने आवश्यकता औँल्याएका छन्।
उनको अभिव्यक्तिमा यसपटक निजी क्षेत्र, अन्तर्राष्ट्रिय समुदाय र लगानीकर्ताप्रति विश्वास निर्माण गर्ने स्पष्ट संकेत देखिएको छ। राजनीतिक भाषणभन्दा पर गएर नीति, स्थायित्व र विश्वासको सन्देश दिन खोजिएको विश्लेषण गरिएको छ।
त्यसैगरी उनले पार्टीभित्र अनुशासन कायम गर्न विशेष जोड दिएका छन्। सामाजिक सञ्जालमा देखिने आक्रामकता र विपक्षीप्रति तुच्छ टिप्पणी गर्ने प्रवृत्ति त्याग्न कार्यकर्तालाई निर्देशन दिँदै उनले राजनीतिक संस्कार सुधार्नुपर्ने आवश्यकता औँल्याएका छन्।
सांसदहरूलाई उनले जनताको ‘सेवक’को भूमिकामा रहन आग्रह गर्दै व्यवहारमा सरलता र उत्तरदायित्व देखाउन सुझाव दिएका छन्। सार्वजनिक सेवामा पहुँच र विश्वास बढाउन सकेसम्म सरकारी स्वास्थ्य सेवाको प्रयोग गर्नसमेत उनले आह्वान गरेका छन्।
विगतका प्रमुख राजनीतिक शक्तिहरूको योगदानलाई सम्मान गर्दै लामिछानेले भविष्यको जिम्मेवारी आफूहरूको काँधमा आएको बताएका छन्। पार्टी स्थापना भएको छोटो अवधिमा अनेक चुनौती सामना गर्नुपरे पनि जनताको समर्थनले अघि बढ्न मद्दत गरेको उनले उल्लेख गरेका छन्।
साथै उनले सांसदहरूलाई स्वार्थ समूहको प्रभावबाट जोगिन, मन्त्री पदको दौडमा नलाग्न र व्यक्तिगत स्वतन्त्रताको नाममा अनुशासन नतोड्न चेतावनी दिएका छन्। उनले ‘प्रत्याह्वान’ जस्तो व्यवस्था कडाइका साथ लागू गर्ने संकेत दिँदै जनउत्तरदायित्वलाई प्राथमिकतामा राख्ने सन्देश दिएका छन्।
सरकार गठनसँगै त्यसलाई असफल बनाउन विभिन्न समूह सक्रिय हुने यथार्थ उल्लेख गर्दै उनले सतर्क रहन आग्रह गरेका छन्। वर्तमान संवैधानिक व्यवस्था र प्रणालीप्रति आफ्नो प्रतिबद्धता दोहोर्याउँदै कुनै भ्रम नराख्न उनले आग्रह गरेका छन्।
यसबीच कार्यक्रममा वरिष्ठ नेता बालेन शाहको अनुपस्थिति भने चर्चाको विषय बनेको छ। पार्टीले उनलाई स्वास्थ्यलाभमा रहेको जनाएको भए पनि महत्वपूर्ण कार्यक्रममा अनुपस्थित हुनुका कारणबारे राजनीतिक वृत्तमा जिज्ञासा बढेको छ।
