इरानको सेनाले आइतबार इराकको कुर्दिस्तान क्षेत्र र खाडी क्षेत्रमा रहेका अमेरिकी सैन्य अड्डाहरूलाई लक्षित गरी आक्रमण गरेको जनाएको छ। इजरायल र संयुक्त राज्य अमेरिकाको हमलामा इरानका सर्वोच्च नेता आयातोल्लाह अली खामेनी को मृत्यु भएपछि त्यसको प्रतिकारस्वरूप उक्त कारबाही गरिएको इरानी सेनाले स्पष्ट पारेको छ।
राज्य टेलिभिजनमार्फत प्रसारित विज्ञप्तिमा इरानको सेनाले इस्लामिक गणतन्त्र इरानका वायुसेनाका पाइलटहरूले विभिन्न चरणमा सञ्चालन गरिएको अभियानअन्तर्गत फारसको खाडी क्षेत्रका देशहरूमा रहेका अमेरिकी अड्डा तथा इराकको कुर्दिस्तान क्षेत्रमा रहेका सैन्य संरचनाहरूलाई सफलतापूर्वक बम प्रहार गरेको उल्लेख गरेको छ।
यसअघि इजरायल र संयुक्त राज्य अमेरिका ले इरानमाथि संयुक्त आक्रमण गर्दा खामेनीको मृत्यु भएको इरानी सञ्चारमाध्यमहरूले जनाएका थिए। त्यसपछि मध्यपूर्व क्षेत्रमा सैन्य तनाव तीव्र रूपमा बढेको छ।
इरानी सेनाको यो दाबीबारे स्वतन्त्र रूपमा पुष्टि हुन सकेको छैन। घटनापछि क्षेत्रीय सुरक्षा अवस्था थप जटिल बन्ने सम्भावना व्यक्त गरिएको छ।
